Τὸ κόμμα ΣΥΡΙΖΑ νικᾷ ἐν ταῖς ἀρχαιρεσίαις

Ὁ Ἀλέξης Τσίπρας Τὸ κόμμα ΣΥΡΙΖΑ ἐνίκησεν ἐν ταῖς ἀρχαιρεσίαις τῇ Κυριακῇ. τῆς Ἑλλάδος ἐν βαθείᾳ οἰκονομικῇ κρίσει κειμένης, οἱ πολῖται, νομίζοντες ἤδη ἱκανῶς παθεῖν, τὸν τοῦ ΣΥΡΙΖΑ ἄρχοντα, τὸν Ἀλέξην Τσίπραν (τῷ ἔτει 1974ῳ γεγονότα), νέον τῆς χώρας πρωθυπουργὸν ᾕρηνται. πῶς ἔξεσται νῦν τῷ Τσίπρᾳ χώραν σῴζειν ἣ τυγχάνει τοσαῦτα χρήματα ἄλλαις χώραις ὀφείλουσα; οὐδένα λανθάνει τοῦτο χαλεπώτατον ἐσόμενον.

πάντες ἴσμεν τὰ τῆς Ἑλλάδος προβλήματα δύο ὄντα, πρῶτον μὲν τὰ χρήματα ἃ ἄλλαι χῶραι ἀπ' αὐτῆς ἀπαιτοῦσιν, δεύτερον δὲ ἡ μέση τάξις, τὸ τῶν πολιτῶν μέρος ὃ χρήματα πορίζειν δύναται, ἤδη πάλαι ἠφανίσθη.

χθὲς δὲ ὁ Τσίπρας, ἤδη πρωθυπουργὸς καταστάς, παραυτίκα τὸν τῶν ὑπουργῶν ἀριθμὸν ἐμείωσεν, νῦν γὰρ μόνον δέκα ὑπουργοὺς ἕξει ἡ νέα ἀρχή (ὀκτωκαίδεκα τὸ πρότερον)· καὶ δὴ καί, οὐκ ἐξὸν τῇ χώρᾳ τοσαῦτα χρέα ἀποτίνειν, βούλεται ὁ νέος πρωθυπουργὸς τοῖς χρήσταις περὶ τῶν χρεῶν διαλέγεσθαι, αἵτινες γὰρ χῶραι χρήματα τῇ Ἑλλάδι ἐδάνεισαν φοβοῦνται νῦν μὴ οὐ δύνωνται ἀναλαβεῖν.

ἔνιοι οἰκονομισταὶ ἔλεγον ὅτι ἡ Εὐρωπαικὴ Ἕνωσις τὴν Ἑλλάδα ἐκ τῆς Εὐρωζώνης ἐκβαλεῖν, εἰ τὸ ΣΥΡΙΖΑ νικῴη, ἐν νῷ ἔχοι, τοῦτο δὲ τῷ ὄντι οὐ ποιήσει ἡ ΕΕ, ἑαυτὴν γὰρ βλάψειε ἂν εἰ τοῦτο ποιοίη. 

 http://www.akwn.net/
 AKROPOLIS WORLD NEWS    Τὰ νέα ἑλληνιστὶ γεγραμμένα